Inter Miami Won With Lionel Messi: കൂടെ നിൽക്കുന്നവന്റെ ഉള്ള് തൊടുന്ന മജീഷ്യൻ!Inter Miami won with Lionel Messi ലയണൽ മെസിയെ ആരാധിക്കുന്നവരും ആരാധിക്കാത്തവരുമുണ്ട്. എന്നാൽ ഹേറ്റേഴ്‌സിനുപോലും മെസിയോട് ബഹുമാനം തോന്നിപ്പോകുന്ന ഒരു കാഴ്ചയാണ് അടുത്തിടെ ഫുട്‍ബോൾ ലോകം കണ്ടത്. അമേരിക്കയിൽ ചരിത്രം കുറിച്ച് മുന്നേറുന്ന മെസിയുടെ ഒരു വീഡിയോ ഇപ്പോൾ സോഷ്യൽ മീഡിയ ആഘോഷിക്കുകയാണ്. മേജർ ലീഗ് സോക്കർ ക്ലബ്ബായ ഇന്റർ മയാമിയിലെത്തി 36 -ാം നാളിൽ ടീമിനെ കന്നിക്കിരീടത്തിലെത്തിച്ച മെസി വിജയത്തിന്റെ ക്രെഡിറ്റ് ടീമിന്റെ മുൻ ക്യാപ്റ്റന് പങ്കുവെക്കുന്ന വീഡിയോ ആണിത്. 2023 ലീഗ്‌സ് കപ്പ് ട്രോഫി ഇന്റർ മയാമി സ്വന്തമാക്കിയത് നാഷ് വില്ലയെ പെനാൽറ്റി ഷൂട്ടൗട്ടിലൂടെ കീഴടക്കിയാണ്. ഷൂട്ടൗട്ടിൽ വിജയിച്ച ഉടൻ തന്റെ കയ്യിൽ കെട്ടിയിയിരുന്ന ക്യാപ്റ്റൻ ബാൻഡ് മുൻ ക്യാപ്ടൻ ഡി ആൻഡ്രെ യെഡ്ലിന് കയ്യിൽ കെട്ടിക്കൊടുക്കുകയാണ് മെസി ചെയ്തത്. അദ്ദേഹം മെസിയോട് വേണ്ടെന്ന് പറയുന്നതും മെസിയുടെ കയ്യിൽ തന്നെ അത് കെട്ടാൻ ആവശ്യപ്പെടുന്നതും വിഡിയോയിൽ കാണാം. പക്ഷെ, മെസി നിർബന്ധപൂർവ്വം ആ ബാൻഡ് കെട്ടിക്കൊടുക്കുകയും പിന്നീട് കപ്പുയർത്തുന്ന സമയത്ത് ആദ്യം യെഡ്ലിന് കപ്പ് നൽകി വേദിയിലേക്ക് കയറാൻ നിർബന്ധിക്കുകയും ചെയ്യുകയാണ്.