'ഇൻസ്പയറിംഗ്' എന്ന തലക്കെട്ടോടെ 24കാരിയെ പുകഴ്ത്തി ലോക്സഭാ സ്പീക്കർ
തിരുവനന്തപുരം വീഡിയോസ് സബ്സ്ക്രൈബ് ചെയ്യൂ
അംബേദ്കറെക്കുറിച്ച് പ്രസംഗിച്ച് മലയാളികളുടെ അഭിമാനമായി മാറിയിരിക്കുകയാണ് 24കാരിയായ എ.എസ് അനുഷ. തിരുവനന്തപുരം നേമം സ്വദേശിയായ അനുഷ പാർലമെന്റിന്റെ സെൻട്രൽ ഹാളിൽ നടന്ന ഡോ. ബി.ആർ. അംബേദ്കർ അനുസ്മരണ ചടങ്ങിലാണ് പ്രസംഗിച്ചത്. പാർലമെന്റിന്റെ സെൻട്രൽ ഹാളിൽ ലോക്സഭാ സ്പീക്കർ ഓം ബിർളയും ലോക്സഭാ സെക്രട്ടറി ജനറൽ ഉത്പൽ കുമാർ അടക്കമുള്ള സദസിന് മുന്നിലായിരുന്നു അനുഷയുടെ പ്രസംഗം. സ്പീക്കർ ഓം ബിർള തന്റെ സോഷ്യൽ മീഡിയ പേജിൽ 'ഇൻസ്പയറിംഗ്' എന്ന തലക്കെട്ടിൽ അനുഷയുടെ പ്രസംഗം പങ്കുവെക്കുകയും ചെയ്തു, ഇതോടെ അനുഷയും അനുഷയുടെ 3 മിനിട്ട് പ്രസംഗവും ഏവരുടെയും ശ്രദ്ധ പിടിച്ചുപറ്റി. കേന്ദ്ര യുവജനകാര്യ മന്ത്രാലയത്തിനു കീഴിലുള്ള നെഹ്റു യുവകേന്ദ്രയും ലോക്സഭാ സെക്രട്ടേറിയറ്റിനു കീഴിലുള്ള പാർലമെന്ററി റിസർച് ആൻഡ് ട്രെയിനിങ് ഫോർ ഡെമോക്രസിയും (പ്രൈഡ്) ചേർന്നാണു പാർലമെന്റിൽ അംബേദ്കർ അനുസ്മരണം നടത്തിയത്. ചടങ്ങിൽ പങ്കെടുക്കുന്നതിനു കേരളത്തിൽനിന്നു തിരഞ്ഞെടുക്കപ്പെട്ട ഏക പ്രതിനിധിയും അനുഷയായിരുന്നു. വിവിധ സംസ്ഥാനങ്ങളിൽനിന്നു തിരഞ്ഞെടുക്കപ്പെട്ട 25 പേരിൽ പ്രസംഗിക്കാൻ അവസരം ലഭിച്ചതു അനുഷയടക്കം 7 പേർക്കു മാത്രമായിരുന്നു.