ബൈക്കും ലോറിയും കൂട്ടിയിടിച്ച് യുവാവ് മരിച്ചു
വാണിയംകുളത്ത് ബൈക്കും ലോറിയും കൂട്ടിയിടിച്ച് അപകടം. അപകടത്തിൽ ബൈക്ക് യാത്രികനായ യുവാവ് മരണപ്പെട്ടു. ഒറ്റപ്പാലം സ്വദേശി വി എച്ച് മുഹമ്മദ് ഒഫൂർ ആണ് മരിച്ചത്. അപകടം നടന്നത് ബുധനാഴ്ച രാത്രി പത്തു മണിയോടെ വാണിയംകുളം പാതിപ്പാറ പെട്രോൾ പമ്പിനു സമീപത്ത് വച്ചായായിരുന്നു. ഐസ്ക്രീം കച്ചവടം കഴിഞ്ഞ് തൃശ്ശൂരിൽ നിന്നും ഒറ്റപ്പാലത്തെ വീട്ടിലേക്ക് തിരികെ വരുകയായിരുന്നു മുഹമ്മദ് ഒഫൂർ. ബൈക്ക് കോഴിക്കോട്ടേക്ക് മീനുമായി പോവുകയായിരുന്ന ലോറിയുമായി കൂട്ടിയിടിക്കുകയായിരുന്നു. തമിഴ്നാട് രജിസ്ട്രേഷനുള്ള ലോറിയാണ് അപകടത്തിൽപ്പെട്ടത്. യുവാവിനെ ഉടനെ വാണിയംകുളത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. അപകടത്തിൽ യുവാവിന്റെ തലയ്ക്ക് ഗുരുതരമായി പരിക്കേറ്റിരുന്നു. അപകടത്തിൽ ബൈക്ക് പൂർണമായും തകർന്നു.palakkadTimesXP MalayalamUpdated: 20 Apr 2023, 7:33 pm