ബൈക്കുകൾ മോഷ്ടിച്ച കുട്ടികള്ളന്മാരെ പിടികൂടി
1008 views
കോഴിക്കോട് വീഡിയോസ് സബ്സ്ക്രൈബ് ചെയ്യൂബൈക്കുകൾ മോഷ്ടിച്ച ഏഴ് കുട്ടികളെ പിടികൂടി സിറ്റി സ്പെഷ്യൽ ആക്ഷൻ ഗ്രൂപ്പ്, കോഴിക്കോട് ജില്ലയിലെ വിവിധ ഭാഗങ്ങളിൽ നിന്നാണ് കുട്ടികൾ ബൈക്കുകൾ മോഷ്ടിച്ചത്. ഇരുചക്രവാഹനങ്ങൾ മോഷണം പോകുന്നതു വർധിച്ച സാഹചര്യത്തിൽ ജില്ലാ പോലീസ് മേധാവി രാജ്പാൽ മീണയുടെ നിർദ്ദേശ പ്രകാരം നടത്തിയ അന്വേഷണത്തിലാണ് കുട്ടികളുടെ സംഘം പിടിയിലായത്. മോഷണം നടന്ന സ്ഥലങ്ങളിലെ സിസിടിവി ദൃശ്യങ്ങൾ പരിശോധിക്കുകയും അതിലുൾപ്പെട്ടവരെപ്പറ്റി അന്വേഷണം നടത്തുകയുമായിരുന്നു. സംഘത്തിലുൾപ്പെട്ടവരെല്ലാം തന്നെ പ്രായപൂർത്തിയാവാത്തവരാണെന്ന് മനസ്സിലാക്കിയ പോലീസ് ഇവരുടെ രക്ഷിതാക്കളെ വിളിച്ചുവരുത്തുകയും വിവരങ്ങൾ ധരിപ്പിക്കുകയും ചെയ്തു. ബൈക്ക് ഓടിക്കാനുള്ള ആഗ്രഹം കൊണ്ടും ലഹരിഉപയോഗിക്കാനും ആർഭാട ജീവിതത്തിന് പണം കണ്ടെത്താനുമാണ് മോഷണം നടത്തുന്നത് എന്ന് പിടിയിലായവർ പോലീസിനോട് പറഞ്ഞു. പ്രധാനമായും സ്പ്ലെൻഡർ ബൈക്കുകളാണ് മോഷണം നടത്തിയത്. മോഷ്ടിച്ച ശേഷം ഉടമസ്ഥരും പോലീസും തിരിച്ചറിയാതിരിക്കാൻ വാഹനങ്ങൾക്ക് രൂപമാറ്റം വരുത്തുകയും വ്യാജ നമ്പർ പ്ലേറ്റുകൾ ഘടിപ്പിക്കുകയും ചെയ്യും. മോഷ്ടിച്ച വാഹനങ്ങളിൽ ചിലത് പൊളിച്ചുവിറ്റു. ചിലത് കുറച്ചു കാലം ഓടിച്ച ശേഷം കുറഞ്ഞ വിലയ്ക്ക് വിറ്റതായും ഇവർ മൊഴി നൽകി.