Gas Insulated Sub Station: സംസ്ഥാനത്തെ ആദ്യ 400 കെവി ഗ്യാസ് ഇൻസുലേറ്റഡ് സബ് സ്റ്റേഷൻ കോട്ടയത്ത്
1014 views
കോട്ടയം വീഡിയോസ് സബ്സ്ക്രൈബ് ചെയ്യൂസംസ്ഥാനത്തെ ആദ്യ 400 കെവി ഗ്യാസ് ഇൻസുലേറ്റഡ് സബ് സ്റ്റേഷൻ കോട്ടയത്ത്. കെഎസ്ഇബിയുടെ കോട്ടയം ഗ്യാസ് ഇൻസുലേറ്റഡ് 400 കെവി സബ് സ്റ്റേഷനാണ് യാഥാർഥ്യമായത്. കുറവിലങ്ങാട് പ്രൈവറ്റ് ബസ് സ്റ്റാൻഡിൽ നടക്കുന്ന ചടങ്ങിൽ മുഖ്യമന്ത്രി പിണറായി വിജയൻ നാടിനു സമർപ്പിക്കും. കിഫ്ബി ഫണ്ടിൽ നിന്ന് 152 കോടി രൂപ ചെലവഴിച്ചാണ് നിർമ്മാണം പൂർത്തിയാക്കിയത്. ട്രാൻസ്ഗ്രിഡ് 2.0 പദ്ധതിയിലൂടെയാണ് ഗ്യാസ് ഇൻസുലേറ്റഡ് സ്വിച്ച് ഗിയറുള്ള സംസ്ഥാനത്തെ ആദ്യ 400 കെവി സബ് സ്റ്റേഷൻ കുറവിലങ്ങാട്ട് സ്ഥാപിച്ചത്. തിരുനെൽവേലി - കൊച്ചി ലൈൻ വഴി 400 കെവി അന്തർസംസ്ഥാന പ്രസരണലൈൻ ഉപയോഗിച്ച് കൂടംകുളം ആണവനിലയത്തിൽനിന്ന് വൈദ്യുതി മധ്യകേരളത്തിൽ എത്തിക്കാൻ ഈ സബ് സ്റ്റേഷൻ വഴി സാധിക്കും. 400 കെവി പ്രസരണലൈനിലൂടെ വൈദ്യുതി സ്വീകരിച്ച് 220 കെവി ആക്കി വിവിധ ജില്ലകളിലേക്ക് വിതരണം ചെയ്യുമെന്ന് അധികൃതർ പറഞ്ഞു. ഇതിനായി 400 കെവിയുടെ നാലു ഫീഡറുകളും 315 എംവിഎയുടെ രണ്ടു ട്രാൻഫോമറുകളും 220 കെവിയുടെ ആറു ഫീഡറുകളും സജ്ജമായിട്ടുണ്ടെന്നും ഉദ്യോഗസ്ഥർ അറിയിച്ചു. പള്ളം, ഏറ്റുമാനൂർ, അമ്പലമുകൾ എന്നീ 220 കെവി സബ് സ്റ്റേഷനുകളിൽ വൈദ്യുതി എത്തിച്ച് വിതരണം ചെയ്യും. തുറവൂരിൽ സബ് സ്റ്റേഷൻ യാഥാർഥ്യമാകുന്നതോടെ ആലപ്പുഴയ്ക്കും പ്രയോജനം ലഭിക്കും. മൂന്നു ജില്ലകളിലെ വോൾട്ടേജ് ക്ഷാമപ്രശ്നങ്ങൾക്കും പരിഹാരമാകുമെന്നാണ് വിലയിരുത്തുന്നത്. 24.7 മെഗാവാട്ട് ശേഷിയുള്ള വൈദ്യുതി ഉത്പാദനനിലയം സ്ഥാപിക്കുന്നതിനു തുല്യമായാണ് കോട്ടയം ഗ്യാസ് ഇൻസുലേറ്റഡ് 400 കെവി സബ് സ്റ്റേഷനെ കണക്കാക്കുന്നത്. സംസ്ഥാനത്തിന്റെ വൈദ്യുതി ഇറക്കുമതി ശേഷി 3860 മെഗാവാട്ടായി ഉയർത്താനും സബ് സ്റ്റേഷൻ സഹായിക്കുമെന്നും അധികൃതർ വ്യക്തമാക്കി.