വിഷു വിപണി കീഴടക്കി കൃത്രിമ കണിക്കൊന്ന |Kanikonna
വിഷുവിന് ആഴ്ചകള്ക്കു മുന്പെ കണിക്കൊന്ന പൂത്തിരുന്നുവെങ്കിലും ഇക്കുറി വിപണിയിലെത്തിയിരിക്കുകയാണ് കൃത്രിമ കണിക്കൊന്ന. വിഷുക്കണി വയ്ക്കുന്നവയില് ഏറ്റവും പ്രധാനപ്പെട്ടതായ കണിക്കൊന്നയ്ക്കും അപരനായി വിപണി കീഴടക്കുകയാണ് കൃത്രിമ കണിക്കൊന്ന. കണ്ണൂര് ജില്ലയിലെ ഒട്ടുമിക്ക ഫാന്സി കടകളിലും സൂപ്പര്മാര്ക്കറ്റുകളിലും കണിക്കൊന്ന നിറഞ്ഞിരിക്കുകയാണ്. വിഷുക്കണിയൊരുക്കാന് കണിക്കൊന്ന പറിക്കാന് മെനക്കെടാതെ ഡ്യൂപ്ളിക്കേറ്റ് കണിക്കൊന്ന വാങ്ങാന് ആളുകള് താല്പര്യം കാണിക്കുന്നുണ്ടെന്നാണ് കച്ചവടക്കാര് പറയുന്നത്. മാലമാലയായി ഇവ തൂക്കിയിട്ടാണ് ഇവര് ആളുകളെ ആകര്ഷിക്കുന്നത്. പരിസ്ഥിതി സൗഹാര്ദ്ദമായ പ്രത്യേക തരം തുണികൊണ്ടാണ് ഇവ നിര്മിക്കുന്നതെന്നാണ് വ്യാപാരികള് പറയുന്നത്. കോഴിക്കോട്, ഗുരുവായൂര് എന്നിവടങ്ങളില് നിന്നാണ് ഈ കൃത്രിമ കണിക്കൊന്ന കണ്ണൂരുള്പ്പെടെയുളള ജില്ലകളിലെത്തുന്നത്. ഇലയോടുകൂടിയുളള ഒരു ശാഖയ്ക്ക് എണ്പതു മുതല് 85 രൂപ വരെ വിലയുണ്ട്. കാലവസ്ഥാ വ്യതിയാനം കാരണം കണ്ണൂരിലെ ഗ്രാമങ്ങളിലും നഗരങ്ങളിലും ഇക്കുറി നേരത്തെ പൂത്തിരുന്നു. വിഷുവിന് ഇനിയും ദിവസങ്ങളുളളതിനാല് വിരിഞ്ഞ പൂക്കള് ആവശ്യത്തിന് ഉപയോഗിക്കാനായില്ലെങ്കില് പകരം ഈ കണിക്കൊന്നകള് ഉപയോഗിക്കാമെന്ന വിശ്വാസത്തിലാണ് പലരും ഡ്യൂപ്ളിക്കേറ്റ് കണിക്കൊന്ന വാങ്ങി കൂട്ടുന്നത്. kannurTimesXP MalayalamUpdated: 6 Apr 2023, 6:51 pm