Urulikund Waterfall: പതഞ്ഞൊഴുകി ഉരുളിക്കുണ്ട് വെള്ളച്ചാട്ടം; സഞ്ചാരികളുടെ തിരക്ക്
കണ്ണൂർ വീഡിയോസ് സബ്സ്ക്രൈബ് ചെയ്യൂ
ഇരിക്കൂർ ഉരുളിക്കുണ്ടിൽ വിനോദ സഞ്ചാരികളുടെ തിരക്കേറുന്നു. ബ്ലാത്തൂർ റോഡിലെ ഉരുളിക്കുണ്ടിൽ ഇപ്പോൾ നിത്യേന നൂറുകണക്കിന് സന്ദർശകരാണ് എത്തുന്നത്. 50 അടിയോളം താഴ്ചയിലേക്ക് മടക്കുകളായി പതഞ്ഞൊഴുകുന്ന വെള്ളത്തിൽ ഉല്ലസിക്കുന്നതിന് സമീപ ജില്ലകളിൽ നിന്നുവരെ വിനോദസഞ്ചാരികള് എത്തുന്നുണ്ട്. തട്ടിത്തെറിച്ചും വേരുകൾക്കിടയിൽ കൂടിയും ഒഴുകിയെത്തുന്ന വെള്ളം എത്ര ശക്തമായ മഴയിലും കലങ്ങില്ലെന്നതും എത്ര കൊടുംവെയിലിലും കുളിർമ നഷ്ടപ്പെടില്ലെന്നതുമാണ് ഇവിടത്തെ സവിശേഷത. അതോടൊപ്പം നുരഞ്ഞൊഴുകുന്ന വെള്ളത്തിനു നടുവിലുള്ള പാറക്കെട്ടുകളിൽ കൂടി ഇരുനൂറു മീറ്ററോളം ദൂരത്തിൽ പടവുകൾ പോലെ കയറിപോകുവാൻ ഇവിടെ കഴിയും. വള്ളിപ്പടർപ്പുകളാൽ മൂടപ്പെട്ടും വൻമരത്തിന്റെ വേരുകളാൽ ചുറ്റപ്പെട്ടും കിടക്കുന്ന ഇവിടെ കുട്ടികൾക്കുപോലും സഞ്ചരിക്കാൻ വളരെ എളുപ്പമാണ്. വെള്ളച്ചാട്ടം പോലെ കുതിച്ചൊഴുകുന്ന തുടക്കവും താഴെ ഉരുളിപോലെ വട്ടത്തിൽ കിടക്കുന്ന ഉരുളിക്കുണ്ട് എന്ന സ്ഥലവുമാണ് സന്ദർശകരുടെ ഇഷ്ടയിടങ്ങൾ. ഉരുളിക്കുണ്ടിൽ കുളിക്കുന്നതിനും നീന്തൽ പഠിക്കുന്നതിനും കഴിയും വിധമാണ് ഇതിന്റെ കിടപ്പ്. അതുകൊണ്ടുതന്നെ അവധിസമയങ്ങളിൽ വിദ്യാർഥികളാണ് ഇവിടെ എത്തിച്ചേരുന്നതിലേറെയും. വെള്ളച്ചാട്ടത്തിന്റെ മനോഹരമായ സൗന്ദര്യവും ശാന്തമായ അന്തരീക്ഷവും പ്രകൃതിസ്നേഹികൾക്കും വിഷ്വൽ, ഫോട്ടോഗ്രാഫി പ്രേമികൾക്കും അനുയോജ്യമായ സ്ഥലമാക്കി മാറ്റുകയാണ്.