Sarngakavu Temple: കാവും വാനരന്മാരും ഉള്ള ക്ഷേത്രം; ശാര്ങ്ഗക്കാവ് ദേവീക്ഷേത്രത്തെക്കുറിച്ച് അറിയാം
ആലപ്പുഴ വീഡിയോസ് സബ്സ്ക്രൈബ് ചെയ്യൂ
നയന മനോഹരമായ കാവും കാവിൽ അതിവസിക്കുന്ന വാനരന്മാരെയും കാണാൻ ശാര്ങ്ഗക്കാവിലേക്ക് പോരൂ. ചെങ്ങന്നൂർ വെണ്മണി ഗ്രാമത്തിലാണ് ഈ ക്ഷേത്രം സ്ഥിതി ചെയ്യുന്നത്. അച്ചന്കോവിലാറിനെ തൊട്ടുരുമ്മിയാണ് ശാര്ങ്ഗക്കാവ് (ചാമക്കാവ്) ദേവീക്ഷേത്രം സ്ഥിതി ചെയ്യുന്നത്. യോഗീശ്വരനായ ശാര്ങ്ഗ മഹര്ഷി തപസ് ചെയ്ത വനപ്രദേശമാണ് ഇത്. അദ്ദേഹം ആരാധിച്ചിരുന്ന സ്വയംഭൂവായ ശിലാരൂപമാണ് ഇന്നും ആരാധിക്കപ്പെടുന്നതെന്നും വിശ്വസിച്ചുപോരുന്നു. ശാര്ങ്ഗ മഹര്ഷി തപസ് ചെയ്ത വനപ്രദേശം എന്നതിനാലാണ് സ്ഥലപ്പേര് ശാര്ങ്ഗക്കാവ് ആയതെന്ന് ചരിത്രരേഖകളില് കാണാം. മേടത്തിലെ വിഷുവിനാണ് ദേവിയുടെ തിരുന്നാള് ആഘോഷം. ഏറെ സവിശേഷതയുള്ളതാണ് വിഷുവിന് ഇവിടെ പ്രദര്ശിപ്പിക്കുന്ന വേലത്തേര്. മൂന്ന് കൂടാരങ്ങള് അടങ്ങിയ അച്ചുതണ്ടില് കറങ്ങുന്ന ഈ തേര് മറ്റെങ്ങും കാണാൻ സാധിക്കില്ല. പന്തളം രാജകുടുംബത്തിന്റെ പരദേവതയായി ശാര്ങ്ഗക്കാവിലമ്മയെ ആരാധിച്ചു വരുന്നു. അയ്യപ്പന്റെ ബാല്യത്തില് ആയുധാഭ്യാസത്തിനായി ഇവിടെ സന്ദര്ശിച്ചിരുന്നതായും പറയപ്പെടുന്നു. ക്ഷേത്രവും പരിസരവും അച്ചന്കോവിലാറ് കരകവിഞ്ഞ് ഒഴുകുമ്പോള് മുങ്ങിപ്പോകാറുണ്ട്. ഈ കാലയളവില് ക്ഷേത്രത്തിലേക്ക് നിത്യപൂജക്ക് വള്ളത്തിലാണ് ശാന്തിക്കാര് എത്താറുള്ളത്. ശാര്ങ്ഗക്കാവ് ക്ഷേത്രത്തിൽ വാനരന്മാർക്കുള്ള ചോറൂട്ട് ഇവിടുത്തെ പ്രധാന വഴിപാടാണ്. കൂടുതൽ സമയം വനത്തിനുള്ളിലെ മരങ്ങളിൽ തന്നെ കഴിയുന്ന വാനരന്മാർ ഉച്ചയോടെ താഴെയിറങ്ങും. എന്നാൽ, ആർക്കും ഉപദ്രവകാരികൾ അല്ല. വാനരന്മാർക്ക് പഴക്കുല, നിലക്കടല മുതലായവ വഴിപാടായി നൽകുന്ന രീതിയും സാധാരണമാണ്. ക്ഷേത്രട്രസ്റ്റിന്റെ അനുവാദത്തോടുകൂടി മാത്രമേ ഇതിനുള്ളിൽ പ്രവേശിക്കാൻ കഴിയൂ. ഉള്ളിൽ പ്രവേശിച്ചാൽ ഒരു വലിയ വനത്തിൽ എത്തിയ പ്രതീതിയാണ് അനുഭവപ്പെടുന്നത്.