മലയാളത്തിന്റെ സ്വന്തം ‘ആടുജീവിതം’ പിന്നാമ്പുറ കാഴ്ചകൾപൃഥ്വിരാജ് നായകനായി എത്തുന്ന ആടുജീവിതം സിനിമയുടെ പിന്നാമ്പുറ കാഴ്ചകൾ പുറത്ത്. അതിസങ്കീർണമായ സാഹചര്യങ്ങളിലൂടെയാണ് അണിയറപ്രവർത്തകർ കടന്നുപോയതെന്ന് തെളിയിക്കുന്ന വീഡിയോ ദൃശ്യങ്ങളാണ് ഇപ്പോൾ പുറത്തുവന്നിരിക്കുന്നത്. ബെന്യാമിന്റെ ആടുജീവിതമാണ് മലയാളത്തിന്റെ പ്രിയ സംവിധായകൻ ബ്ലെസ്സി സിനിമയാക്കിയിരിക്കുന്നത്. തുടക്കം മുതൽ സിനിമയുടെ ഓരോ അപ്‌ഡേഷനും മികച്ച പ്രതികരണമാണ് ലഭിച്ചുകൊണ്ടിരിക്കുന്നത്. സിനിമയുടെ ഷൂട്ടിംഗ് ആരംഭിച്ച സമയത്ത് കോവിഡ് മഹാമാരിയെ തുടർന്ന് ലോക് ഡൌൺ ഏർപ്പെടുത്തിയതുമൂലം ജോർദാനിൽ ഏതാണ്ട് അറുപത് ദിവസത്തോളമാണ് സംവിധായകൻ ബ്ലെസിയും പൃഥ്വിരാജും അടക്കമുള്ളവർ കുടുങ്ങിയത്. 30 കിലോയോളം പൃഥ്വിരാജ് ഭാരം കുറച്ച് നിൽക്കുന്ന അവസ്ഥയിലായിരുന്നു അന്ന്. അതുകൊണ്ട് തന്നെ ചിത്രീകരണം മാറ്റുകയോ നീട്ടിവെച്ചാലോ താൻ വീണ്ടും ആ അവസ്ഥയിലേക്ക് മാറേണ്ടതുണ്ടെന്നതാണ് സംവിധായകന്റെ മുന്നിലെ പ്രധാന വെല്ലുവിളിയായിരുന്നത് എന്ന് പൃഥ്വിരാജ് വിഡിയോയിൽ പറയുന്നു. ഈ ദിവസങ്ങളിൽ ടീമംഗങ്ങൾക്ക് ഊർജം പകരുന്നതിനായി എല്ലാവരെയും നേരിൽ കണ്ട് സംസാരിച്ചിരുന്നുവെന്നും വിഡിയോയിൽ പൃഥ്വിരാജ് വ്യക്തമാക്കുന്നു. മരുഭൂമിയിൽ ക്രിക്കറ്റ് കളിക്കുന്നതിന്റെയും പരിശോധനകൾ നടത്തുന്നതിന്റെയും ഓർമകൾ ഡോക്യുമെന്ററി വീഡിയോയായി പുറത്തുവിട്ടിരിക്കുകയാണ് അണിയറ പ്രവർത്തകർ. സിനിമാ പ്രേമികൾ ഏറെ പ്രതീക്ഷയോടെ കാത്തിരിക്കുന്ന ചിത്രം 2024 ഏപ്രിൽ 10-ന് തിയേറ്ററുകളിൽ എത്തും.