Moto Morini Cruiser Motorcycle: ഏറ്റവും പുതിയ ക്രൂയിസർ മോട്ടോർസൈക്കിൾ അവതരിപ്പിച്ച് മോട്ടോ മോറിനിമോട്ടോ മോറിനി ഏറ്റവും പുതിയ ക്രൂയിസർ മോട്ടോർസൈക്കിൾ ആഗോള തലത്തിൽ അവതരിപ്പിച്ചു. മോട്ടോ മോറിനി കാലിബ്രോ 650 എന്ന മോഡലാണ് കമ്പനി അവതരിപ്പിച്ചത്. എക്‌സ്-കേപ്പ് അഡ്വഞ്ചർ ബൈക്കിന്റെയും സീമെസോ സ്‌ക്രാംബ്ലറിന്റെയും അതേ എഞ്ചിനുമായിട്ടാണ് മോട്ടോ മോറിനിയുടെ ക്രൂയിസർ മോട്ടോർസൈക്കിൾ പുറത്തിറക്കിയിരിക്കുന്നത്. മെലിഞ്ഞതും 15 ലിറ്റർ ഫ്യൂവൽ ടാങ്ക് കപ്പാസിറ്റിയുള്ളതുമായ ഒരു സ്വൂപ്പിങ് ഫ്യൂവൽ ടാങ്കാണ് ബൈക്കിലുള്ളത്. 649 സിസി പാരലൽ-ട്വിൻ എഞ്ചിനാണ് ഈ ബൈക്കിന് കരുത്ത് നൽകുന്നത്. ഈ എഞ്ചിൻ 60 ബിഎച്ച്പി പവർ ഉത്പാദിപ്പിക്കുന്നു. 6 സ്പീഡ് ഗിയർബോക്സുമായിട്ടാണ് ബൈക്ക് എത്തുന്നത്. നിലവിൽ ബൈക്ക് അന്താരാഷ്ട്ര വിപണിയിലാണ് അവതരിപ്പിച്ചിരിക്കുന്നത്. വൈകാതെ ഈ ബൈക്ക് ഔദ്യോഗികമായി ലോഞ്ച് ചെയ്യും. ഈ മോട്ടോർസൈക്കിൾ അടുത്ത വർഷം എപ്പോഴെങ്കിലും ഇന്ത്യൻ വിപണിയിലെത്തുമെന്നാണ് പ്രതീക്ഷിക്കുന്നത്. ലോഞ്ച് ചെയ്താൽ റോയൽ എൻഫീൽഡ് 650 ഡ്യുവോ, റോയൽ എൻഫീൽഡ് സൂപ്പർ മെറ്റിയർ 650, കവാസാക്കി വൾക്കൻ എസ്, എന്നിങ്ങനെയുള്ള സെഗ്‌മെന്റിലെ മറ്റ് ബൈക്കുകളുമായി മോട്ടോ മൊറിനി കാലിബ്രോ 650 മത്സരിക്കും.